Sapakan sasudah rirayo urang rantau lah mulai baliak katampaik bakureh masiang-masiang dirantau. Kampuang lah mulai langang, carito pagi dilapau muko KPU.
Karano masih bulan syawal kini mohon maaf lahia bathin ambo ka Angku Katik Mudo lah dulu. Lah mulai bakarajo urang hariko sarupo nan taralah kecek Rajo Malintang sambia minum Teh Talua dilapau mangecek ka Angku Khatik Mudo.
Kalau nan hari partamo ado ciek jo duo nan talambek masuak kantua bagai kecek Angku Khatik Mudo.
Ondeh lupo ambo Angku Khatik Mudo, pasan lah minum ado Teh Talua, kopi, Teh bagai. Kok nak capek kopi ginseng padiah juo mah kecek Rajo Malintang.
Kaba barito nan tadanga dari rumah bagonjong lai umpamo saratuih parsen pagawai nan masuak karajo tadanga jo awak Angku Khatik Mudo.
” Sapanjang nan Angku katahui kalau dirumah bagonjong satiok hari partamo apak Gubenur ko nyo caliak ciek ciek kapalo OPD sarato pagawai dilingkuangan rumah bagonjong” kecek Angku Khatik Mudo
Kalau dikantua awak KPU ko lai langkok pajabaik jo pagawai nan tibo ka kantua. Karano salamo libur rirayo pagawai KPU ndak ciek alah juo nan buliah libur.
Baa mangko baitu, rirayo kaduo urang KPU pusaik malantik anggota KPU kabupaten/kota. Katiko talaik malantik KPU kabupaten/kota bisa bagawa pulo urang KPU. Dek karano salah sangenek urang partai bisa mamupuah KPU karano malangga tahapan, kecek Angku Khatik Mudo.
Tahun kini, jo tahun bisuak lah kasamo sajo nasib pagawai KPU ko mah Rajo Malintang kecek angku Khatik Mudo. Karano ndak sampai satahun urang lah ka mamiliah Presiden jo Wakia Rakyaik.
Ka itulah angku, kok carito iko kadibaco di lapau ndak ka amuah habih dohh, dek hari lah mulai tinggi ko angku Khatik Mudo bialah ambo nak pai mancari bareh agak satekong dulu angku. Kalau ndak lo pai bakureh ndak barasok dapua beko angku Khatik Mudo,
Rang lapau bara minum ambo jo Angku Khatik Mudo ?. Ko pitihnyo rang lapau.
yolah Angku nan minum pagi lah ambo baia.
Jadi malah, tarimokasih Rajo Malintang bilo-bilo wakatu lapang kito sambuang carito ko baliak.
